Seksjonsleiar kontorseksjon – Yrkesmedisinsk avdeling

Vi søkjer ein seksjonsleiar som ønskjer å bidra til høg kvalitet og gode tenester knytt til pasientservice og merkantile oppgåver hos oss.

Som seksjonsleiar vil du ha ansvar for dei merkantilt tilsette ved Yrkesmedisinsk avdeling. Det er til saman 5 tilsette ved seksjonen. Oppgåvene til dei merkantilt tilsette omfattar mellom anna leiarstøtte, skrankefunksjon, telefonservice, pasientinnkalling, journalskriving og varebestilling.

Om Yrkesmedisinsk avdeling
Yrkesmedisinsk avdeling har ansvar for Helseregion Vest. Avdelinga har Arbeidsmedisinsk poliklinikk, Seksjon for klinisk spesialallergologi, Seksjon for hyperbarmedisin med stort kammeranlegg for hyperbar oksygenbehandling, Norsk senter for maritim- og dykkemedisin, Radio Medico, seksjon for sjukepleie og merkantil seksjon.

Avdelinga tar generelt imot pasientar til utgreiing og dels behandling av komplekse medisinske tilstandar. Ei rekkje ulike medisinske spesialitetar samt yrkeshygienikarar og psykologar er representert. Arbeidet er utprega tverrfagleg og det er nødvendig med gode samhandlingsevner. Avdelinga har kvalitetsregistre og god forskingsaktivitet.

Som seksjonsleiar har du eit overordna fagleg ansvar for dei merkantile funksjonane ved Yrkesmedisinsk avdeling. Du vil mellom anna ha ansvar for gode samhandlingsrutinar og god utnytting av elektroniske støttesystem innan administrasjon, dokumentasjon og rapportering.

Seksjonsleiar er underlagd og rapporterer til klinikkdirektør, og vil arbeide tett saman med klinikkdirektør og leiargruppa som består av seksjonsleiarane.